Roach

S Rootaug (Rutilus rutilus; alemanischi Näme) isch e aapassigsfääige Schwarmfisch, wo unempfindli uf Wasserverschmutzig isch. S werd hüüffig mit em Rottel verwechslet.

Uussie

S Rootaug isch e slibrige Fisch miteme brüünliche Rugge und rooten Auge. Au sini Buuchflosse sind röötlich. S werd 20 bis 35 cm lang und wögt maximal anderthalb Kilo.

Verbraitig

S Rootaug chunnt z Sibirie und i Europa vor, ooni Island, Norwege und onöd im Mittelmeerruum. S liebt warmi, suurstoffarmi aber näärstoffriichi Standgwässer oder Flüüssgwässer mitere langsame Ströömig und lebt au i strandnööche Lagune mit Brackwasser.

Lebeswiis

S Rootaug isch e Bodefisch, wo Wasserpflanze, Plankton und Wirbellosi fresst. S werd vo Raubfisch, bsunders vom Zander und Hecht, gjagt.

D Laichzitt isch im April und Mai bi Wassertemperature vo 10 bis 17 Grad. S Wiibli lait a flache Stele i Uufernööchi abertuusigi Aier, wo a Wasserpflanze und Stai chlebe bliibet. Noch 5 bis 14 Taag schlüüffet denn d Laarfe. Noch 2 bis 4 Joor wered di junge Fischli gschlechtsriiff, binere Längi vo guet 12 cm. Rootauge chönd 14 Joor alt were.

Büecher

• Stefan Ineichen (Hrsg.): Stadtfaune, 600 Tierarten der Stadt Zürich; Bern 2010; ISBN 978-3-258-07561-7
• Günther Sterba: Süßwasserfische der Welt. Weltbild Verlag, Augsburg 2002, S. 312-313 ISBN 3-89350-991-7.
• Steinbachs Naturführer, Süßwasserfische, Mosaik Verlag, München, 1984, ISBN 3-570-01274-3
• Peter S. Maitland: Der Kosmos-Fischführer – Die Süßwasserfische Europas in Farbe, Franckh’sche Verlagsbuchhandlung, Stuttgart, 1977, ISBN 3-440-04468-8.
• Christian Teubner, Kerstin Mosny: Das Grosse Buch vom Fisch, Teubner Edition, ISBN 3-7742-2053-0