O Saga pedo ye un insecto ortoptero escaso que se distribuye dende a peninsula iberica dica o noreste de China y ye l'ortoptero més gran d'Europa.
A suya largura plega a 12 cm. O suyo cuerpo ye muito estirato, con un oviscapto muito visible y unas antenas igualment luengas y insertas entre os uellos.
As patas presentan femurs y tibias con punchas pa ensopinar as suyas presas (por un regular atras grillas), d'una traza pareixita a un plegamans.
No se conoixe o masclo, només a fembra, que ye tetraploide y se reproduce por partenochenesi (Kallenbach, 1967).
Se distribui por China noroccidental, Kazaquistán, Uzbequistán, Tachiquistán, Azerbaichán, Cheorchia, Rusia, Rumanía, Bulgaria, Eslovaquia, Chequia, Hongría, Secilia, Cerdenya, Corcega, Occitania y Espanya. En Espanya s'ha citato d'as provincias de Albacet, Badajoz, Ciudad Real, Cuenca, Toledo, Segovia, Madrid, Valencia, Tarragona, Chirona y Zaragoza. A cita d' Aires y Menano de 1916 pa Portugal la han descartata bells autors uno dimpués d'atro.
Se troba en gran variedat d'habitats, ye una especie xerotermofila que puet amaneixer en qualsiquier tipo de vechetación, y lo han descrito en pueyos, marguins de selvas, puestos con hierba alta, chinebrals, sabinars, restrollos. En Catalunya lo han trobato en maticals silicicolas formatos por estepas, brucos y barzas dende 70 dica 1.065 m sobre o libel d'a mar. En Albacet se troba dica l'altaria de 1.540 m en Cerro Padrón. En a provincia de Zaragoza ye citato d'o Galacho de l'Alfranca.
A UICN lo declara vulnerable. Esta especie ye catalogata por o catalogo d'as especies amenazatas d'Aragón como d'intrés especial por o Decreto 49/1995, d'o 28 de marzo.
O Saga pedo ye un insecto ortoptero escaso que se distribuye dende a peninsula iberica dica o noreste de China y ye l'ortoptero més gran d'Europa.
