S Albeli oder de Heglig (Coregonus heglingus; alemanischi Näme) isch e chllini Felchenart, wo im Walesee und im Zürisee vorchunnt. S gliicht starch em Albeli wo im Vierwaldstättersee lebt, aber en anderi Felchenart isch und e dunklere Rugge hett.
S Albeli isch e chliine silbrige Fisch, wo öppe 25 cm lang werd. De Rugge cha liecht brüünlich sii. Es het chliini Auge und chliini Flosse, di dünkleri Schwanzflosse isch starch ggablet.
S Albeli chunnt nume im Walesee und im im Zürisee vor. S reagiert recht empfindli uf Wasserverschmutzig und ghört drum zu de gföördete Fischarte.
S Albeli isch e Schwebfelche, wo i fraiem Wasser underhalb vonere Tüüffi vo 10 Meeter “schwebt” und sich vo Plankton, aber au vo Wasserschnegge ernäärt.
D Laichzitt vo de Albeli im Zürisee isch im Summer ab em Juli und findet inere Tüüfi vo 20 bis 80 Meter ufem Seebode statt. Di wichtigste Laichplätz sind bim Seedamm bi Rapperschwiil und bi de Halbinsle Au. Do s aber au Albeli gitt, wo im Dezember laichet, werd vermuetet, as es vermuetli zwoo verschidnigi Albeliarte im Zürisee gitt, wo aber optisch nöd underschide were chönd. D Albeli im Walesee laichet vom Oktober bis November. Vor 1900 hets zwoo Arte gee, d Summerlaicher (Juli-Sept.) und d Winterlaicher (Dez.-Fb.). Nochem Bau vom Linthkanal in Walesee isch di ganzi Albelipopulation im Walesee zämebroche. Spööter isch den de Herbstlaicher entdeckt wore, ooni as klaar isch, woher die chunnt. Vermuetlich het sich e hybridi Mischform entwicklet, wo mit de noie Wasserverhältnis im Walesee zrang chunnt.
S Albeli oder de Heglig (Coregonus heglingus; alemanischi Näme) isch e chllini Felchenart, wo im Walesee und im Zürisee vorchunnt. S gliicht starch em Albeli wo im Vierwaldstättersee lebt, aber en anderi Felchenart isch und e dunklere Rugge hett.
