De Echten Kraken (Octopodidae) sünd mit mehr as 40 Geslechter de gröttste Familie mank de Ornen vun de Kraken.[1][2] Dat Geslecht vun de Kraken an sik (Oktopusse) is, mit mehr as 80 Aarden, dat gröttste in düsse Familie.
Mank de Echten Kraken gifft dat de wecken Aarden, de ehr Lief is jiddelig, fleeschhaftig oder muskulös. Dat Lief bi de Echten Kraken besteiht ut Mantel, Kopp un Tentakels, mit Suugproppens doran. De gröttste Aart, de bitherto bekannt is, is de Pazifische Resenkrake (Enteroctopus dofleini) ut dat Geslecht Enteroctopus. Siene Arms sünd fiev Meters lang.[3] De lüttjste Aart is bit up düssen Dag de Pygmäenkrake (Octopus wolfi) ut dat Geslecht vun de Kraken an sik. He is man bloß tein Zentimeters groot.
Wie lang de Tentakels sünd, vergleken mit dat Lief, dor verscheelt sik de allerhand Aarden in. Dat kann vun de dubbelte Längde vun den Mantel bit hen to teinmol so lang gahn.[4] An de Binnensiete sitt de Tentakels vull mit Suugproppens. De enkelten Aarden verscheelt sik dorin, wie veel dat sünd. Gegen de Teinarm-Dintenfische over, as bi de Pieldintenfische, staht de Suugproppens nich up Steele, man sitt liek up’n Arm. Dor git dat ok keen Hakens oder Tähne an.
De meisten Echten Kraken hefft en Gift, dat is man swack un keen Gefohr for den Minschen. Anners sütt dat ut bi dat Geslecht vun de Blaukringelkraken (Hapalochlaena). Wenn düsse Kraken tobieten un Gift afgeven doot, kann dat ok Minschen dootmaken. Dor hannelt sik um dat Nervengift Tetrodotoxin (TTX), dat ok unner de Naams Maculotoxin oder Tarichatoxin bekannt is. Ok annere Deerter hefft düt Gift, as man Kogelfisch un Sniggen.[5] Düt Gift warrt nich vun de Kraken sülms herstellt, man vun Bakterien, de in’n Vördarm un in’e Severdrüsen vun de Kraken leevt un de an de Kinner wietergeven weert.
De allerhand Aarden vun de Echten Kraken sünd in all Ozeane tohuse un in all Klimazonen up’e Eer antodrepen. Se hoolt sik in ganz verscheden Umto up, as Felsen- un Korallenriffe, Seegraswischen un Algenbedden, up Sand, Slick un annere weeke Unnergrünne.[6] De meisten Echten Kraken leevt an’n Grund vun de See. De wecken Geslechter sünd bit hen to 5.000 Meters deep unner Water funnen wurrn.[7]
De Familie vun de Echten Kraken besteiht ut mehr, as 40 Geslechter mit mehr, as 250 Aarden. Dat gifft Aarden, de weert noch in Unneraarden updeelt. Allerhand Aarden sünd avers noch nich beschreven un staht hier nich mit bi.
. Mehr Biller, Videos oder Audiodateien to’t Thema gifft dat bi Wikimedia Commons. De Echten Kraken (Octopodidae) sünd mit mehr as 40 Geslechter de gröttste Familie mank de Ornen vun de Kraken. Dat Geslecht vun de Kraken an sik (Oktopusse) is, mit mehr as 80 Aarden, dat gröttste in düsse Familie.
