Tamariza ye a denominación común d'as especies d'o chenero Tamarix, propias de zonas secas y salobrals u suelos salobrencos.
Son arbustos con fuella perén u caduca u chicotz árbols entre 1 y 15 m d'altaria.
As ramas son finas y o follache gris verdenco. A crosta d'as brancas chovens ye lisa y royenca-parda. Con a edat se fan rugosas y de color porpra. As fuellas tienen 1–2 mm y se solapan, a sobén tienen secrecions incrustatas de sal.
As flors son blancas u rosencas, están en densas masas de 5–10 cm en as puntas d'as brancas en primavera y verano (fueras de T.aphylla).
Cada flor puet producir mils de simients d'1 mm de diametro, contenitas en una chicota capsula por un regular adornata con una tufa de pelos que aduyan a que l'aire se las leve (dispersión anemofila). Tamién pueden dispersar-sen con l'augua. A cherminación desiche que o suelo siga saturato muitos días.
En os salobrals plegan a tolerar dica 15000 ppm de NaCl y tolerar alcalis. Ye capable d'aproveitar l'augua sotorrana, con una radices que plegan dica o libel freatico. Aturan a expansión d'atras plantas absorbendo sal que acumulan en o suyo follache en forma de concreccions que dimpués cayen a lo suelo, on se concentra estando verenoso pa atras plantas. Tamién ye adaptato a cremar-se y tornar a rechitar.
En a Val de l'Ebro a especie més comuna de tamariza ye Tamarix gallica, pero en a salada de Chiprana a que ye present ye Tamarix boveana. Son intresants as selvas galería de Tamarizas en a Val Cuerna, o tamarizal d'o Vedau de Penyaflor y o tamarizal d'El Planerón.
Tamariza ye a denominación común d'as especies d'o chenero Tamarix, propias de zonas secas y salobrals u suelos salobrencos.
