Ll'urzo bruno marsecano (Ursus arctos marsicanus) è nu mammifero unnivoro d'â famiglia 'e ll'Ursidi: è na sottospecie 'e ll'urzo bruno (Ursus arctos) endemeca 'e ll'Italia centro-meridiunale, arró supravvive cu cenquanta esemplare.
Ha na curpuratura turzuta, pure se cchiù asciutta 'e chella d'ate sottospecie d'urzo bruno. 'A capa è gruossa e nu poco tunna, cu nu musso celindreco e nasìcchio, e nu gruosso taratùfolo nero. 'O pilo è bruno-fulvo uneforme 'ngopp'ô cuorpo 'ntero, pure se cchiù scuro a 'e ciampe, ca songo gruosse e furzute. Ll'uocchie songo piccerille e scure, pettramente pure 'e rrecchie songo piccerelle e tunne, a 'e llate d'â capa. 'A coda è nu mognone 'e 10cm.
Ll'esemplare mascule peseno nfra 'e 100 e 150kg e impiete songo àvete 1,50 - 1,80 metri, tramente 'e femmene songo cchiù piccerelle d'ô 25% tanto 'n grannezza e peso. Grazzie a cheste mesure, 'o marsecano è uno r'ê cchiù gruosse mammifere carnivure 'e ll'Italia, 'o cchiù granne d'â parte meridiunale d'ô paese.
'A specie, primma presente 'n tutta 'a zona a est 'e ll'Appennine da 'e Marche â Puglia, ogge è cunfinata schitto 'int'a ll'Appennino centrale, nfra ll'Abbruzzo e 'o Mulise, 'ncapo 'o Parco nazziunale 'e ll'Abruzzo, Lazzio e Mulise, 'o Parco nazziunale d'â Majella, chello reggiunale d'ô Sirente Velino e cacche vota 'int'a chello nazziunale d'ô Gran Sasso.
Ll'urzo bruno marsecano (Ursus arctos marsicanus) è nu mammifero unnivoro d'â famiglia 'e ll'Ursidi: è na sottospecie 'e ll'urzo bruno (Ursus arctos) endemeca 'e ll'Italia centro-meridiunale, arró supravvive cu cenquanta esemplare.
