Common Buckthorn

Pšawy gokowc (Rhamnus cathartica) jo kerk ze swójźby gokowcowych rostlinow (Rhamnaceae).

Rhamnus cathartica

Wopis

Pšawy gokowc jo kerk, kótaryž dośěgnjo wusokosć wót 1 až do 3 m. Gałuzy se cesto ze śernjom skóńcyju.

Łopjena

Łopjena su kulowate až šyroko-jajojte a dośěgnu dłujkosć wót 4 až do 6 cm. Wóni njasu na wobyma bokoma 3-4 wobłukate nerwy. Na staršych gałuzach stoje w promjenjach, mjaztym až na młodšych gałuzach su pśeśiwo stojece. Jich kšoma jo śańko rězana.

Łopjenowy wogonk jo dlejše ako pódlańske łopjeńka.

Kwiśonki

Kwiśo wót maja až do junija. Žołtozelene, wónjate kwiśonki su styrilicbne, dośěgnu šyrokosć wót 4 až do 5 mm a stoje pó dwěma až pó wósymych we łopjenowych rozporach.

Płody

Płody su carne jagodojte twardopackate płody, kótarež dośěgnu šyrokosć wót 6 až do 8 mm.

Stojnišćo

Rosćo w słyńcnych žywych płotach, na lěsnych kšomach, w swětłych lěsach a suchych pastwach.

Rozšyrjenje

Rostlina jo w pódpołdnjowej Skandinawiskej, w srjejźnej a pódpołdnjowej Europje rozšyrjona.

Wužywanje

Něga bu z płodow zelena barwa zgótowana, kótaraž bu w mólarstwje a k barwjenju papjery a kóže wužywana.

Nožki

1. ↑ W internetowem słowniku: Kreuzdorn

Žrědła

• Schauer - Caspari: Pflanzenführer für unterwegs, ISBN 978-3-8354-0354-3, 2. nakład, 2008, bok 460 (nim.)
• Spohn, Aichele, Golte-Bechtle, Spohn: Was blüht denn da? Kosmos Naturführer (2008), ISBN 978-3-440-11379-0, bok 242 (nim.)