Os Arthropoda u artropodos (d'o griego arthron «articulación» y podos «piet») son o Phyllum d'o Reino Animal que presenta o numero d'especies més gran, son aquaticos u terrestres, holotrofos, necrofagos u parasitos, pero a més gran part herbivoros.
Presentan simetría bilateral, cuerpo segmentato, pero a diferiencia d'os anelidos os segmentos se presentan en grupos (ditos tagmas), y o celoma ye redueito en l'adulto. Os diferents grupos de segmentos u tagmas son especializaus en diferents funcions y presentan apendices diferenciaus pa una clara división d'o treballo (por eixemplo pueden estar patas, antenas, mandibulas, etcetra...).
Bi ha un exoesqueleto (cuticla) segregau por a epidermis y formau por tres napas laminadas: epicuticla, exocuticla (de proteínas y lipidos) y endocuticla, (més dobla y formada por quitina y proteínas). A quitina ye un polisacarido nitrochenau duro, liuchero, resistent y insoluble a l'augua, alcalis u acidos febles. En beluns o exoesqueleto tien entrants (apodemas), pa que s'inserten os musclos.
A cada segmento li corresponden 2 apendices pars, encara que a vegadas han desapareixiu u s'han modificau. Con un exoesqueleto asinas de resistent un apéndiz sería immóbil, pero os artropodos pueden mover-los gracias a l'articulación: os apendices son palancas vuidas con musclos voluntarios y pelos sensitivos, y encara que en a evolución s'ha produeito una diversidat a saber-lo de formas, siempre bi ha dos seccions separadas por una articulación de caracter primario: -Sección coxal. -Sección d'o cabo.
O exoesqueleto da protección, millora y locomoción, y a més proteche d'a desecación, y ixo ha permeso a muitos artropodos de colonizar o medio terreste, pero no sin inconvenients, como por eixemplo o creiximiento y a mida.
O exoesqueleto ye un obstaclo pa o creximiento, y ixo se resuelve con o creiximiento a intervalos, producindo-se l'abandono d'una cuticla viella y o endurimiento d'una cuticla nueva. Por un regular bi ha 4-6 mudas. O exoesqueleto tamién imposa limitacions a la mida, y por ixo no pueden estar muito grans.
En o exoesqueleto puet haber-ie carbonato calcico, pigmentos (melanina, carotenoides, cromoproteidos, ezt...) y pueden tener e pelos (a vegadas sensitivos), punchas y sedas.
Bi ha un sistema muscular complexo inserto en o exoesqueleto, con musclos estriaus, pa accions rapedas y lisos pa movimientos viscerals.
A sección coxal s'implanta en a membrana pleural, podendo estar simple u subdividir-se en protopodio, subcoxa y coxa, y en atros tres artillos.
As estructuras d'a base de l'apéndiz pueden adhibir-se a las pleuras como escleritos pleurals. A sobén o protopodio leva exitos (epidopoditos), por un regular respiratorios (branquias) y enditos (gnatobases si tienen función masticadora).
A sección d'o cabo (telopodito) ye més variable que l'anterior, car s'ha adaptau a muitas funcions seguntes os grupos. En beluns s'ha dividiu en 2 partz: femoral y tibial, cadaguna formata por qualques podomeros, en atros s'ha dividiu en tres partz: femoral, patelar y tibial.
A respiración puet estar cutania, branquial, traquial y dica pulmonar.
O sistema circulatorio ye derivau de l'anelidiano pero simplificau. A circulación ye ubierta, y bi ha un conchunto de lacunas plenando entresillos y senos que forman o hemocele. No bi ha vasos verdaders, de fueras d'un corazón dorsal, tubular y un sistema arterial muito redueito que no ye un poquet desembolicau que en os de respiración branquial. O corazón ye en realidat un vaso pulsatil con dos foratos d'admisión (ostiolos) con valvulas. A hemolinfa cercula dende dezaga ta debant, sale d'o corazón por una aorta anterior, y as arterias la levan a los senos d'o hemocele. A hemolinfa cercula por o hemocele entre as visceras, tornando a la cambra pericardica y entrando en o corazón por os ostiolos, que tienen valvulas que no deixan que se'n torne ta dezaga.
A sistole se consigue por contracción cardiaca, a diastole por contracción de musclos de l'aparato locomotor.
L'aparato dichestivo ye completo, a boca tien apendices, como mandibulas y maxilas, pa ensopinar y masticar, y palpos pa tastar. Os apendices d'a boca son adaptaus a diferents formas d'alimentación.
O sistema niervoso ye pareixiu a lo d'os anelidos, encara que con ganglios més grans y organos d'os sentius més desembolicaus. Ye formau por un cerebro ganglionar dorsal que conecta a traviés d'un collar periesofachico con una doble catena niervosa ventral con 1 par de ganglios por segmento, con estructura en forma d'escalera. En os crustacios, insectos y miriapodos no bi ha que una cadena ventral de ganglios, producto d'a fusión d'os dos cordons niervosos, que encara pueden diferenciar-sen.
Presentan patrons d'intelichencia complexos en os que l'aprendizache chuega un papel important. Bi ha gran desembolique d'os organos sensorials, dende sensilas con función tactil, olfativa, auditiva, quimica y d'equilibrio dica o uello multifacetau.
Por un regular dioicos, con dimorfismo sexual y organos y conductos reproductos pars, Por un regular con fecundación interna. Pueden estar oviparos u ovoviviparos. A sobén bi ha metamorfosi. Bi ha casos de partenochenesi.
A clasificación en clases ye clara pero agrupar ixas clases en superclases y subphyllum ye controvertito, sobretot por o que fa a las clases fósils. Tamién bi ha unas clases que encara que sigan a man d'os artropodos verdaders no tienen totas as caracteristicas d'os artropodos, (onicoforos por eixemplo).
Dentro d'os artropodos bi ha exemplars d'intrés alimenticio, (marisco) d'intrés economico, (por os productos que producen u por os que destruyen), y d'intrés sanitario (foco d'infeccions u por estar animals de fizada verenosa).
Muitos crustacios se minchan, especialment os decapodos, (cangrillos), tenendo importancia economica os cangrillos marins. Tamién se minchan os percebes. Minchar insectos u aracnidos no ye bien visto en a cultura occidental, pero bi ha culturas en atros países on se minchan dreitament os insectos (por eixemplo os aborichens australians se minchan as formigas-bota y en atros países se minchan os escarbachos u os grillas de mida aceptable, y dica as tarantulas.
Encara que os insectos no se minchen en Occident, si que se consume a miel que producen as abellas, estando l'apicultura una actividat antiga y muito extendita. Os crustacios planctonicos, que no se minchan tradicionalment, pueden estar indicadors de bancos de pesca.
Bi ha insectos que fizan con o suyo fizón (abellas, viespas), as aranyas y ciengarras no tienen fizón y fizan con os quelicers y forciclas respectivament. Os arraclaus encara que sigan aracnidos fizan con un fizón y no pas con os quelicers.
A fizadura d'os mosquitos ye con l'aparato bucal y no con garra fizón y puet trasmitir microbios u nematodos que causan malautías (malaria, malautía d'o suenio, elefantiasis, ecetra...). Bi ha crustacios que pueden agüespar nematodos y platelmintos parasitos de l'hombre.
En agricultura os insectos se tienen en cuenta por o poder de esdevenir plagas. Ya en a Biblia mencionan as plagas de langostos. Atros insectos que pueden estar plaga son a mosca d'a fruita, o trips, as chinches, os polecons, a procesionaria, o piollo de Sant Chusé, o escarbacho d'a pataca y as polillas. Pero l'hombre puet fer servir un insecto contra atro, (depredadors u parasitoides), como ye o caso d'as viespas.
Bi ha artropodos con importancia en a industria u artesanía producindo sustancias d'intrés comercial. As abellas a més de producir miel producen cera. Os lepidoptero Bombus produce seda (cuco d'a seda). Un producto industrial produeito por un insecto ye o carmín y, d'atras especies, se'n obtién laca. D'os meloidos se puet obtener un afrodisiaco (spanish fly).
Os insectos son eslabons intermediarios de catenas alimentarias que tienen en o suyo cabalto especies útils pa l'hombre, tamién ye important en ixo a función polinizadora d'os insectos.
Os Arthropoda u artropodos (d'o griego arthron «articulación» y podos «piet») son o Phyllum d'o Reino Animal que presenta o numero d'especies més gran, son aquaticos u terrestres, holotrofos, necrofagos u parasitos, pero a més gran part herbivoros.
