Salaria fluviatilis (Asso, 1801) ye una especie de peix d'augua dulza de la clase Actinopterygii, orden Perciformes y familia Blenniidae, la sola especie d'augua dulza d'esta familia. Presenta una distribución circummediterrania y fue descrito scientificament por primera vegada por lo naturalista aragonés Ignacio Jordán Claudio de Asso y del Río.
No se conoix lo nombre que tenió en aragonés quan se charraba en arias de la Depresión de l'Ebro a on encara se troba u quan se distribuiba como abundant por endreituras a on encara se charra aragonés. En catalán de Nonasp li dicen burret, denominación que en catalán s'aplica tamién a los blenidos d'augua salada.
Presenta una distribución tipicament circummediterrania, trobando-se en ríos y zonas humidas de tierras que rodeyan la Mar Mediterrania: Val de l'Ebro, Catalunya, Occitania, Suiza, Italia, Croacia, Montenegro, Albania, Grecia, Turquía, Siria, Chordania, Liban, Israel, Alcheria y Marruecos. Tamién se troba en Portugal.
En Aragón se puet u podeba trobar en los ríos Ebro (incluitos los entibos de Mequinenza y Ribarroya), Matarranya, Guadalop, Cinca, y los suyos afluents Guatizalema, Alcanadre, Flumen, Susía, Isuala y Vero. Tamién se troba en la Canal Imperial d'Aragón y la Cequia de Pina d'Ebro.[1]
Encara a ran global no ye en periglo de desaparición, en la Val de l'Ebro ye cada vegada mes escaso, trobando-se en pocos puestos.
Las accions humanas que amenazan la suya existencia son la destrucción de l'habitat, la extracción de gravas, la extracción d'augua, la canalización de los ríos, las entibaderas y la contaminación de los ríos que produce eutrofización[2]
La conservación de Salaria fluviatilis influye en la conservación de Margaritifera auricularia, bivalvo d'augua dulza que presenta una etapa de lo suyo ciclo biolochico como parasito en las branquias d'este peix.
Salaria fluviatilis (Asso, 1801) ye una especie de peix d'augua dulza de la clase Actinopterygii, orden Perciformes y familia Blenniidae, la sola especie d'augua dulza d'esta familia. Presenta una distribución circummediterrania y fue descrito scientificament por primera vegada por lo naturalista aragonés Ignacio Jordán Claudio de Asso y del Río.
