Ła stéła alpina (Edelweiss in todesco, stelutis alpinis in furlan, planika in sloveno) ła xe na pianta de montagna e ła xe ciamà Leontopodium alpinum 'nte ła clasificaxion de Linneo.
El nome Leontopodium vol dir "pie de leòn", parchè na volta i disèa che el ghe someja apunto a na sata de un leon. Ła stéła alpina ła fa parte dełe Compositae, pi de preciso dełe Asteraceae. Ła piantina ła xe alta dai 5 ai 20 çentimetri e ła ga dałe 5 ałe 15 bratèe felpà bianche come ła neve co in meso i fioreti veri e propri che xe załi. El tenpo deła fioridura el va da lujo a setenbre.
Ła pianta ła vien su soratuto su tereni calcarei, ma ła se pol trovar ciare volte anca sui prà. Ł'altèsa sua ła va dai 1800 ai 3000 metri e ła vive su tute łe Prealpi Venete, ma anca su tute łe Alpi, sui Carpazi, sułe Alpi Dinariche e sui Pirenei.
Ła stéła alpina ła xe sta selta come sinboło da diverse istituxion. Ła xe el sinboło dełe Squadre Sanitarie dei Volontari de Protexion Civiłe del'Asociaxion Naxionale Alpini (Associazione Nazionale Alpini) in Italia, dei club alpini in Germania, Austria e in Sudtirolo (Deutscher Alpenverein, Oesterreicher Alpenverein, Alpenverein Suedtirol). In Svisera ła ga l'ente turistico e na compagnia de voli charter (Schweiz Tourismus e Edelweiss Air).
Ła stéła alpina ła se trova sul skeo da 2 çentesimi de euro austriaci. Nei ani trenta e quaranta del secoło pasà, vegnèa ciamà pirati deła steła alpina (Edelweisspyraten) grupi de tosi e tose deła Rexistensa todesca al regime naxista. Raquanti de sti tosi i xe sta portà 'ntei campi de conçentramento o inpicà.
Ła stéła alpina (Edelweiss in todesco, stelutis alpinis in furlan, planika in sloveno) ła xe na pianta de montagna e ła xe ciamà Leontopodium alpinum 'nte ła clasificaxion de Linneo.
El nome Leontopodium vol dir "pie de leòn", parchè na volta i disèa che el ghe someja apunto a na sata de un leon. Ła stéła alpina ła fa parte dełe Compositae, pi de preciso dełe Asteraceae. Ła piantina ła xe alta dai 5 ai 20 çentimetri e ła ga dałe 5 ałe 15 bratèe felpà bianche come ła neve co in meso i fioreti veri e propri che xe załi. El tenpo deła fioridura el va da lujo a setenbre.
