Hazegerf of Duizendblad (Achillea millefolium) ies 'n plant oet de Composietefamilie, gesjlach Achillea. Achilles zou de heilende wèrking op wónde höbbe óntdèk. 't Ies 'n algemein euverblievende plant van 45cm huègde in berme van waeg, op grazig terrein en op ruderaal plaatse. Hazegerf haet twiè- of drievoudig gedeilde vaerdeilige blaar. De sjermblome weure gevörmp door klein wiette knuupkes en sjtoon meistens mèt vief sjtraolblome bie-ein, wiet of roze gekleurd. De bleuj vèlt van juli tot oktober. 'ne Andere Limburgse volksnaam ies Tabaksbloom, vanwege 't gebruuk es pseudotabak in de oorlog. Hazegerf ies 'n ónderdeil van de kroedwösj.
